Awit para sa along naligaw / sa dagat ng mga tao

batang alon / tumatawid / sa kalsada ng ulan

paikot-ikot sa kanal / di makita ang daan

walang mapa ang mundo / walang pipigil sa iyo

kundi ang sarili mo

hahampas ka na lang / sa pader na semento

kung saan iginuhit / mga pangalang / walang may-ari

bakas ang mga pangako / ng kahapon

pag-ibig na wagas / bigla na lang nagwakas

ikaw ang testigo / sa mga maruruming / kamay na humaplos

sa balat ng bato / umukit ng suntok /nagpalawa ng dugo

ilang beses ka na ring / nagpabalik-balik

sa daang walang marka / nakaw

ang mga pangarap / tangay ng baha

habang hinahabol / ng mga paang / lubog sa putikan

at galas ng aspalto

kailan ba naging malapit ang malayo?

matuto kang umuwi / sa iyong tahanan

walang tulay / na babagtasin

ang mundo ay malaya mong daanan

hayaan mo na ang mga patay / na magpalutang-lutang

lahat ay babalik sa kanilang pinanggalingan

at tatangapin ka / ng inang dagat / ng may pagbubunyi

batang alon / nakabalik ka nang muli